தமிழர்களே !பெரிய கோடொன்றை உருவாக்குவோம்

 ஒரு இந்தியனாக அல்ல... தமிழனாக அல்ல... ஒரு மனிதனாக
IPL ஒரு விளையாட்டல்ல... வியாபாரம்... விளையாட்டில் பாகுபாடு கூடாது என்று கூக்குரலிடும் வடக்கு மீடியாக்களுக்கு உரைக்குமா என்றுத் தெரியவில்லை.
தமிழின் நடுநிலையாளன் வள்ளுவன் காட்டிய நெறியில் என்னுடைய சில கருத்துக்கள். எப்பொருள் யார் யார் வாய்க் கேட்பினும்
அப்பொருள் மெய்ப் பொருள் காண்பதறிவு

சிறியக் கோட்டை எப்படி அழிப்பது என்பதிலேயே நேரத்தை செலவிட்டுக் கொண்டிருக்கிறோம். பெரிய கோடொன்றை உருவாக்கும் முயற்சி நம்மிடையே மலர வேண்டும்.இலங்கை பிரச்சினை சிறிய கோடு. நம்முடைய மனித ஆற்றலைப் பயன்படுத்தினால் அதெல்லாம் தூசி. ஆனால் நம்முடைய மனித ஆற்றலை இனம் என்னும் சிறியக் கோட்டால் நாமே சுருக்கிக் கொள்வது அறிவீனம்.

இப்பொழுது சமூக ஊடகங்களில் நாம் சகட்டு மேனிக்கு எல்லோரையும் எதிர்த்துக் கொண்டிருப்பதைப் பார்க்க முடிகிறது. இது உண்மையில் ஆரோக்யமற்ற சூழலாகவே நான் பார்க்கிறேன். நம்முடைய கோபமும், சக்தியும் எதை நோக்கி இருக்க வேண்டும் என்ற புரிதல் உண்மையில் இங்கு இருப்பதாகவே தெரியவில்லை. இலங்கையில் இருக்கும் ஒவ்வொருவரின் சரித்தரத்தையும் புரட்டி அவர்களைப் பற்றிய விவரங்களையெல்லாம் சமூகத் தளங்களில் நம் தமிழர்கள் பதிவிடுவது போன்ற செயல்களையெல்லாம் பார்க்க முடிகிறது. 

இங்கு நடப்பது என்ன வரலாற்றை எல்லோரும் தெரிந்துக் கொள்ள வைக்கும் போராட்டமா...? இல்லை மனித நேயத்திற்கு எதிராக செயல்படும் இலங்கையை எதிர்க்கும் போராட்டமா...?

போராட்டங்கள் எப்பொழுதும் ஒரு இலக்கை நோக்கியே இருந்தால் ஒழிய அதை நாம் அடைய முடியாது. மாணவர்கள் போராட்டம் சமீபத்தில் நிகழ்ந்த ஐ.நா மனித உரிமை கழகத்தில் நிகழ்ந்த தீர்மானத்தை மையமாகக் கொண்டு நடத்தப்பட்டது. சமூக ஊடகங்களும் அதை ஆரோக்யமான விவாதமாக பல முறைகளில் வெளிப்படுத்தியது.

பிறகு அது அப்படியே ஒரு குறிப்பிட்ட சாராரை எதிர்ப்பதற்காக தடம் மாறியது. நடிகர் நடிகைகளை எதிர்த்தது. பிறகு இங்கு வரும் சிங்களவர்களை எதிர்த்தது. அப்படியே ஒரு தனி நபர் விமர்சனமாக மாறி பல தனி நபர்களை எதிர்த்துக் கொண்டு வருகிறது. திடீரென நான் 2000 வருடமாக தமிழன் 70 வருடமாக தான் இந்தியன் என்று வாசகங்களையும் பார்க்க முடிகிறது. இதற்கு தூபம் போடுவது போல் தான் இலங்கை தூதன் ”சிங்களவர்கள் எல்லோரும் இந்தியாவின் வட இந்தியர்கள் தான் என்று நாட்டில் குழப்பத்தை ஏற்படுத்த முயல்கிறார்.

உண்மையில் இது தான் போராட்டமா...? இந்த வீண் வாசகங்களினால் எந்த பலனும் இல்லை. 20009 ல் வர வேண்டிய கோபமே இன்று ஏன் இப்படி விஸ்வரூபம் எடுத்தது. நமக்கு கோபம் வர வேண்டுமென்றால் ஒருவன் படம் பிடித்து தொலைக்காட்சியில் ஒளிப்பரப்பினால் வருமா...? வெட்கமா இல்லை... அப்படியெனில் அன்று தீக்குளித்த முத்துக்குமாரின் கோபம் நியாயமற்றதா...? அவன் கோபமல்லவா நியாயமானது. சம்பவம் நிகழும் பொழுது கோபப்படாமல் இப்பொழுது கொதித்தெழுவது நம்முடைய மிகப் பெரிய அறியாமை. இதை சிங்களவர்கள் தங்களின் அரசியல் ஆதாயத்திற்கு பயன்படுத்திக் கொள்ளத் தான் போகிறார்கள். ராஜபக்சே எத்தனைப் பெரிய ராஜதந்திரி என்பதை நம்முடைய போராட்டங்கள் காட்டுகின்றன. ஏனெனில் நம்முடைய போராட்டங்கள் தமிழர்களை தனிமைப்படுத்துவதாகவே இருக்கிறது. இது பலம் அல்ல... பலவீனம். தமிழனின் பலமே ஒன்றுபடுவது தான்.

உண்மையில் நமக்கு தேவை வள்ளுவர் சொன்ன ராஜதந்திரம். கையாலாகாதவன் தான் பிறரைக் குறைக் கூறிக் கொண்டிருப்பான்.

ஒரு முறை லயோலா கல்லூரி மாணவர் செம்பியனின் உரையை புதிய தலைமுறையில் கேட்க முடிந்தது. உண்மையில் அது மிகச் சிறந்த ராஜதந்திரம். அதை விடுத்து யார் யாரையோ ஏன் மாணவர் போராட்டங்களுக்கு ஆதரவு தரவில்லை. ஏன் குரல் கொடுக்கவில்லை என்று மாணவர்களின் போராட்டத்தின் சக்தியை குறைக்க வேண்டும்.

ஒரு போராட்டத்தில் ஏன் கலந்துக் கொள்ளவில்லை, என்று நாம் கேட்பது. நம்முடைய போராட்டத்தை நாமே பலவீனப்படுத்துவதற்கு சமம். அய்யோ அதில் கலந்துக் கொள்ளாமல் இருந்து விட்டோமே என்று அவர்களல்லவா வருந்தும் அளவு போராட்டம் இருக்க வேண்டும். 

எனவே நல் உள்ளங்களே தயவு செய்து போராட்டத்தில் நீங்கள் கலந்துக் கொள்ளவில்லையென்றாலும். வீணாக சமூக தளங்களில் உங்கள் சுயலாபத்திற்காக உங்களுக்கு எதிர்க்க வேண்டும் என்ற நபர்களை, ஒட்டு மொத்த தமிழர்களின் குரலாக மாற்றி எதிர்க்காதீர்கள். ஏனெனில் இன்று தமிழகத்தில் நிக்ழவது மிகப் பெரிய சர்வ தேசிய அரசியல். இந்த போரே நம் கடல் எல்லையை மையமாக்க் கொண்டு தான் நடத்தப்பட்டிருக்கிறது. இன்னும் இது முடிவடையவில்லை. சீனாவின் சில தந்திரங்களுக்கு நம் தமிழர்கள் துணை செல்வது போல் தான் நாம் நடந்துக் கொள்கிறோம். இந்தியாவை ஆளும் போலி அரசியல் வாதிகளை வைத்துக் கொண்டு நாம் இந்தியாவை நம் நாடல்ல, தமிழ்நாடு தான் என் நாடு என்று குரல் எழுப்புவது. சீனாவின் ராஜதந்திரங்கள் இந்தியாவில் பலித்துக் கொண்டிருப்பதையே காட்டுகிறது. இல்லையேல் சீனா எதற்கு இலங்கைக்கு உதவ வேண்டும்.

தமிழர்களே நன்றாக சிந்திக்க வேண்டிய காலக்கட்டம் இது. நாம் ஒன்றுபட வேண்டிய காலக்கட்டம் இது தான்.
போராட்டம் என்று வரும் பொழுது நாம் ஒரு இனமாகவோ குழுவாகவோ பிரிவது அறிவீனம். எல்லா இன்ங்களையும்,குழுக்களையும் ஒன்று சேர்ப்பதே சிறந்த ராஜதந்திரம். நம் எதிரிகளை நாமே உருவாக்கிக் கொள்ளக் கூடாது. இப்பொழுது வட இந்தியர்களை எதிர்க்கும் மனப்போக்கு நம்மிடையே நிலவுகிறது. இது நமக்கு நாமே படுகுழித் தோண்டுக் கொள்வதற்கு சமம்.
ஒரு கேள்வி “2009 இனப் படுகொலை நிகழும் பொழுது இந்தப் போராட்டம் ஏன் வெடிக்கவில்லை.” நமக்கே 4 வருடம் தேவைப்படுகிறது. அப்படியெனில் வடக்கில் இருப்பவர்களுக்கு நிச்சயம் நாம் கால அவகாசம் தர வேண்டும். பொறுத்திருந்து நம் இலக்கை அடைவதே சிறந்த காரியம். அதை விடுத்து இன்று ஊடகம் இருக்கிறது எது வேண்டுமானாலும் எழுதலாம் பேசலாம் என்று நினைத்தால், வெகு விரைவில் நாம் சீனர்களின் பிடியில் இருந்தாலும் வியப்பதற்கு ஒன்றுமில்லை.
நம் சங்க கால தமிழனின் போர்தந்திரம் இதுவல்லவே தோழர்களே… எதிரிகளை நண்பனாக்கி தங்களுடைய காரியத்தை சாதித்துக் கொள்வது தான் ராஜதந்திரம். அந்த ராஜதந்திரம் இங்கு முகநூலில் கூக்குரலிடும் ஒரு தமிழனுக்காவது தெரிந்திருந்தால் பேசவே மாட்டான். செயலில் இறங்கியிருப்பான்.
1917 பஞ்சாப்பில் நிகழ்ந்த ஜாலின்வாலாபாக் படுகொலையை நினைவில் கொள்ளுங்கள். உத்தம் சிங்கின் தந்திரமும் முயற்சியும் மறந்துவிட்டதா அல்லது கேள்விப்படவே இல்லையா…? தமிழர்களே அது தானே ராஜதந்திரம்.
வீண் வாசகங்களை விடுத்து… இந்திய அரசாங்கமல்ல… இந்த உலகமே நம்மை திரும்பிப் பார்க்க வைக்கும் எதெனும் ஒரு போராட்டமோ ஒரு செயலோ உங்களிடம் இருந்தால் பகிருங்கள்…அதை விடுத்து இந்தியனல்ல… தமிழன் … என்று கூக்குரல் போட்டு
உலக அரங்கில் யாதும் ஊரே யாவரும் கேளீர் என்று குரல் எழுப்பிய நம் தமிழ் சமூகத்தை அவமானப்படுத்தாதீர்கள்.
இந்த உலகையே ஒரே செயலில் திரும்பிப் பார்க்கும் ஒரு ராஜதந்திரம் உண்மையில் தமிழனிடத்தில் இருக்கிறது.பொறுத்திருங்கள்.

நட்புடன் 

தமிழ்ராஜா

கல்லணை : தொழில்நுட்பம்

        

        என்னுடைய வலைத்தளத்தில் நான் வேறு தளத்தில் இருந்துப் பகிர்ந்துக் கொள்ளும் பதிவுகளில் இதுவும் ஒன்று. சிலப் பதிவுகள் மக்களை, குறிப்பாக தமிழக மக்களை சென்றடைய வேண்டும் என்பதால் இந்த பதிவுகளை நான் பகிர்ந்துக் கொள்கிறேன். இது உலக மக்கள்  தமிழர்களைப் பற்றித் தெரிந்துக் கொள்ளும் முயற்சி அல்ல. நாம் நம் முன்னோர்கள் பற்றி தெரிந்துக் கொள்ள வேண்டும் என்ற முயற்யினாலே இப்பகிர்வு.

காந்தி கணக்கு : தமிழர்களின் துரோகச் செயல்(தெளிவான விளக்கம்)

”காந்தி கணக்கு” தமிழ்நாட்டில் பெரும்பாலும் அபத்தமாகப் பிரபலமாகியுள்ளது. இந்த வார்த்தையின் தோற்றம் பற்றி இன்று காலை ஒரு தொலைக்காட்சி அலைவரிசை ஒன்றில் திருமதி பாரதி பாஸ்கர் அவர்கள் பேசினார்.

       அதில் காந்தி கணக்கு என்ற வார்த்தை எப்படி வந்தது என்ற வரலாற்றைச் சொன்னார். பெரும்பாலும் திரும்ப வராத, ஏமாற்றப்பட்ட கணக்குகளையே காந்தி கணக்கில் எழுது என்று சொல்லும் வழக்கம் தமிழர்களிடையே பரவி  இருக்கிறது.

       இந்த வழக்கம் நம் தமிழ்நாட்டில் மட்டும் தானா … பிற மாநிலங்களிலும்  இருக்கிறதா ? என்று ஆராய்ந்தால் இல்லை என்ற பதில் தான் வருகிறது. தமிழ்நாட்டில் மட்டும் தான் இந்த காந்தி கணக்கு என்ற சொல்வழக்கு பரவியிருக்கிறது.

       ஒரு நேர்மையான மனிதரைப் பற்றி இப்படி ஒரு வழக்கம் நிலவுவதை எண்ணி தமிழர்களாகிய நாம் வெட்கப்பட்டே ஆக வேண்டும். இருப்பினும் இந்த வார்த்தை தோன்றிய விதம் தமிழ்நாட்டில் வேறு விதமாகவே உள்ளது.

       இந்தியாவில் சுதந்திரத்திற்கு முன் இருந்த காலக்கட்டங்களில் பல நிறுவனங்களின் கணக்குகளில்  குளறுபடிகள் வரும் பொழுதெல்லாம், அந்த தொகையை சரி செய்ய “ மகாத்மா காந்தியின் சுதந்திரப் போராட்டத்திற்காக நன்கொடையாக அளிக்கப்பட்டது” என்ற கணக்கில் சேர்த்துவிடுவார்களாம். அது மருவி காந்தி கணக்கு என்று மாறி இன்றும் தமிழ் மக்களிடம் பரவி வருகிறது.

       இந்த தலைப்பில் தமிழில் ஒரு திரைப்படம் வேறு வந்தது.பிறகு அந்த தலைப்பிற்கு எதிர்ப்பு வலுக்கவே அதை மகான் கணக்கு என்ற தலைப்பில் வெளியிட்டார்கள். காந்தி கணக்கு என்ற சொல்லிற்கு பின்னே தமிழர்களாகிய நம்முடைய தேச துரோகச் செயல் அப்படமாகத் தெரிவதை நம்மால் மறுக்க முடியாது.

       சுதந்திரப் போராட்டத்திற்காக உதவி செய்யவில்லையென்றாலும், நன்கொடை வழங்கவில்லையென்றாலும், கணக்கில் வராத தொகையையெல்லாம், காந்தியின் போராட்டக் கணக்கில் எழுதிய அந்த துரோகச் செயலை தமிழர்கள் செய்திருக்கிறார்கள் எனும் பொழுது உண்மையில் ஒரு தமிழனாக நான் தலைக் குனிகிறேன்.

       அதுவும் காந்தி கணக்கு என்ற வார்த்தையின் பிரபலம், ஒரு குறிப்பிட்ட தமிழர்களின் ஊழலைப் பறைச்சாற்றுவதாகவே உள்ளது. அந்தக் குறிப்பிட்ட தமிழர்களின் இழிவான செயலால், ஓட்டு மொத்த தமிழர்களின் முகமாகவும் இது இன்று மாறியுள்ளது.

       சுதந்திரப் போராட்டத்திற்காக தன்னுடைய சொத்தையெல்லாம் விற்று கப்பலோட்டியவரும், தமிழர்களாகிய நம் தன்மானத்தைத் தூக்கி நிறுத்தியவருமான வ.உ.சிதம்பரனார் பிறந்த மண்ணில் தான் இப்படி சில ஊழல்காரர்களும் இருந்திருக்கிறார்கள் என்று நினைக்கும் பொழுது, மனது வலிக்கிறது.

       அது மட்டுமின்றி அதை ஏற்கும் விதத்தில் நாமும் தெரிந்தோ தெரியாமலோ இந்த வார்த்தையைப் பயன்படுத்துவது எத்தனைப் பெரிய இழிவான செயல். தமிழர்களின் நகைச்சுவை சிந்தனை ஒரு மகாத்மாவையே இழிவுப்படுத்தும் அளவு கேவலமாகப் போனது எதனால்…?

       சுதந்திரப் போராட்டக் காலத்தில் கூட நாட்டிற்காக கொடுக்கும் கொடையில் தப்பானக் கணக்கை காட்டி அதை காந்தியின் பெயரிலேயே எழுதும் போக்கு எப்படி நம் தமிழர்களுக்கு வந்தது. இன்று இந்திய அரசாங்கம் எதற்கும் எங்களுக்கு உதவவில்லை, என்று கொடித் தூக்கும் பேச்சளவு தமிழர்கள், சுதந்திர வரலாற்றின் ஏடுகளை கொஞ்சம் திரும்பிப் பார்க்க வேண்டும். பக்கத்து நாட்டு விடுதலைக்காக சீறி எழும் தமிழ் வீரர்கள், நம் தேச விடுதலைக்காக நாம் ஆற்றிய ஊழல் பணியை திரும்பிப் பார்த்தால், நாம் இந்தியன் என்று சொல்லிக் கொள்ளவே அருகதையற்று, தமிழன் என்று சொல்லிக் கொள்ளவும் வெட்கப்பட்டு, மனிதன் என்று சொல்லிக் கொள்ளவும் திரானியற்று தான் இருப்போம் என்பதை மறந்துவிடக் கூடாது. 

  தமிழகத்தில் தியாகம் ஒளிவிட்ட காலக்கட்டத்திலேயே, நம் தேசத்திற்காக கொடுத்த கொடையில், இப்படியொரு ஊழல் இருந்திருக்கிறதே…

       இன்றோ சுயநலத்தின் பிடியில் சிக்கியிருக்கும் தமிழகத்தில் ஒவ்வொரு நன்கொடையிலும், திட்டத்திலும் எத்தனை ஊழல் நடந்துக் கொண்டிருக்கும் என்பது அனைவரும் அறிந்த ஒன்றே...

வறுமை எனபது வன்முறையின் மோசமான ஒரு முகம் என்று சொன்னார் காந்தி.  இந்தியாவின் வறுமைக்கு முக்கிய காரணமே ஊழல் தான். அந்த ஊழலின் முதல் படி தமிழகத்தில் காந்தியின் பேரிலேயே ஆரம்பித்திருக்கிறது என்பதை நாம் ஆதரிக்கலாமா…?

       தமிழர்களாகிய நாம் ஊழலைத் தடுக்க முடியவில்லையென்றாலும், இந்த வார்த்தையின் பிரயோகத்தையாவது தடுக்கலாம் இல்லையா…?

       நாம் தமிழர்கள் என்பது உண்மையென்றால், இந்த வார்த்தையை நிச்சயம் நம் சூழலில் இருந்து ஒழித்தே ஆக வேண்டும். இது மகாத்மாவிற்கு நாம் அளிக்கும் மிகப் பெரிய மதிப்பு மட்டுமின்றி, நம் வருங்கால தலைமுறையினர் ஊழலை நகைச்சுவையாக எடுத்துக் கொள்ளக் கூடாது என்ற தொலைநோக்கு சிந்தனையும் தான்.

” இப்படி ஒரு மாமனிதர் நம்மிடையே வாழ்ந்து மறைந்தார் என்பதை வருங்கால தலைமுறையினர் எண்ணி அதிசயப்படுவர், அது மட்டுமின்றி அதை நம்புவது அவர்களுக்கு கடினமாக இருக்கும் “ என்று காந்தியின் மறைவில் ஒரு புகழ்ப் பெற்ற மாமனிதர் சொன்னார்.

       ஆம் அவரின் வாழ்க்கை அப்படியொரு எளிமையானது. நம் கற்பனைக்குள் எளிதில் அகப்படாதது. அவர் தோன்றிய இந்நாளில் தமிழர்களாகிய நாம் இந்த ஊழல் வார்த்தையை நம்மிடையே இருந்து அகற்றுவதை கடமையாகக் கொள்வோம்.தமிழன் மேலுள்ள கரையை அகற்றுவோம். விரைவில் வார்த்தையில் மறையும் ஊழல் நம் வாழ்க்கையிலும் மறையும் என்பதில் நம்பிக்கை வைப்போம்

      

      

வாசக நண்பர்களே பதிவு பிடித்திருந்தால்,உங்கள் கருத்துக்களையும் வாக்கையும் அளித்துவிட்டு செல்லலாமே