• 7.21.2012

    நட்பின் துளிகள்


    சுற்றிக் கொண்டே பூமி நகர்வது போல்
    நட்புக் கொண்டே நகர்கிறது நம் நாட்கள்
    அறிமுகத்தின் ஈர்ப்பு அடங்காமல்
    பகிர்தலில் உனக்கான வெளிகளை
    நீ எனக்கு காண்பிக்க
    எனக்கான வெளிகளை நான்
    உனக்கு காண்பிக்க

    அற்புதமான அந்த நட்பின்
    பிறந்த நாட்களை நிறையவே
    கொண்டாடியது மனம்.
    உனக்கும் எனக்குமான நட்பில்
    பாலினப் பாகுபாடின்றி
    நினைத்தலில் வெற்றிடத்தை
    உணர்கையில் தான்
    நீ எனக்குள் நிரப்பிய
    நட்பின் துளிகளைப் பார்க்கிறேன்.
    சமுத்திரமாய் மாறப் போகும்
    அந்த துளிகளை ஒவ்வொரு நொடியும்
    இருவருமே மாறி மாறித்
    தூவிக் கொண்டே இருக்கிறோம்
    வாழ்வில் ஏதேனும் ஒரு துளி
    நம் நட்பை சமுத்திரமாக்கக் கூடும்
    என்ற எதிர்பார்பின்றியே நிகழ்வில்
    கைக்கோர்த்தபடி நடக்கிறோம்
    என்றேனும் ஒரு நாள்
    அந்தத் துளி உன் விழியிலோ
    அல்லது என் விழியிலோ
    துளிர்க்குமென்றால்
    அன்றும் கொண்டாடுவோம்
    நம் நட்பின் பிறந்த நாட்களை
    கண்ணீர்த் துளிகளோடு...


    வாசக நண்பர்களே பதிவு பிடித்திருந்தால்,உங்கள் கருத்துக்களையும் வாக்கையும் அளித்துவிட்டு செல்லலாமே